ပေကျင်း၊ နိုဝင်ဘာ-၁၉-၂၀၂၅
ရတီ(VOM)
တရုတ်နဲ့ ဂျပန်တို့အကြား ထိုင်ဝမ်အရေးကြောင့် သံတမန်ရေးရာ တင်းမာမှုတွေလျှော့ချဖို့ ပေကျင်းမှာ ဆွေးနွေးခဲ့ပေမယ့်လည်း ပြေလည်ခြင်းမရှိသေးဘဲ တင်မာမှုတွေ ဆက်လက်ဖြစ်ပေါ်နေပါတယ်။
ယခုလအစောပိုင်းက ဂျပန်ဝန်ကြီးချုပ် တာကာအိချိဟာ ထိုင်ဝမ်ကို တရုတ်ကစစ်ရေးအရ တိုက်ခိုက်မယ်ဆိုရင် ဂျပန်ရဲ့ ရပ်တည်ရှင်သန်ရေးကို ထိခိုက်စေတာကြောင့် စစ်ရေးအရ ဝင်စွက်ဖို့နည်းလမ်းကို ဦးတည်သွာနိုင်တယ်လို့ မှတ်ချက်ပြု ပြောဆိုခဲ့ပါတယ်။
ဒီကိစ္စကြောင့် သံတမန်ရေးရာ တင်းမာမှုတွေဖြစ်ပေါ်ခဲ့ပြီး ဂျပန်နိုင်ငံခြားရေးဝန်ကြီးဌာန အာရှနဲ့ သမုဒ္ဒရာရေးရာဗျူရို အကြီးအကဲ ကာနိုင်း မာဆာအာကီဟာ တရုတ်နိုင်ငံခြားရေးဝန်ကြီးဌာနမှာ အလားတူတာဝန်ယူထားတဲ့ လျူဂျင်ဆောင်နဲ့ အင်္ဂါနေ့က တွေ့ဆုံခဲ့ပါတယ်။
တရုတ်နိုင်ငံသားတွေ ဂျပန်သို့ ခရီးသွားခြင်းမှ ရှောင်ကြဉ်ဖို့ အကြံပြုထားတဲ့ တရုတ်နိုင်ငံရဲ့ လုပ်ဆောင်ချက်ကို ပယ်ချခဲ့ပြီး ဂျပန်နိုင်ငံရဲ့ လုံခြုံရေးမှာ ပိုမိုဆိုးရွားလာတာမရှိဘူးလို့ ဆွေးနွေးပွဲများအတွင်း ကာနိုင်းမာဆာအာကီက ပြောပါတယ်။
ဝန်ကြီးချုပ် တာကာအိချိ၏ မှတ်ချက်ကို တုံ့ပြန်တဲ့အနေနဲ့ အိုဆာကာရှိ တရုတ်ကောင်စစ်ဝန်ချုပ် ရွှီးကျန်းက ဝန်ကြီးချုပ်ရဲ့ ညစ်ပတ်တဲ့ခေါင်းကို ဖြတ်ပစ်မယ်ဆိုပြီး ရေးသားထားတဲ့ လူမှုမီဒီယာပို့စ်တခုကိုလည်း ကာနိုင်းက ပြင်းပြင်းထန်ထန် ကန့်ကွက်ခဲ့ပါတယ်။
ဆွေးနွေးပွဲအပြီးမှာတော့ မီဒီယာတွေနဲ့ တွေ့ဆုံပြောဆိုလေ့မရှိတဲ့ တရုတ်နိုင်ငံခြားရေးဝန်ကြီးဌာန အာရှနဲ့ သမုဒ္ဒရာရေးရာဗျူရို အကြီးအကဲ လျူဂျင်ဆောင်က အစည်းအဝေးရလဒ်က လုံးဝကျေနပ်စရာမရှိဘူးလို့ ပြောပါတယ်။
တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်ကလည်း ဂျပန်ဝန်ကြီးချုပ်ရဲ့ မှားယွင်းတဲ့ မှတ်ချက်ကို တရုတ်နိုင်ငံအနေနံ့ ပြတ်ပြတ်သားသား ဆန့်ကျင်ကြောင်း ထပ်လောင်းပြောကြားခဲ့ပါတယ်။ ဒီလိုပြောဆိုမှုကို ရုပ်သိမ်းဖို့ ဂျပန်ကိုတောင်းဆိုထားတယ်လို့ ဆိုပါတယ်။
ဂျပန် နိုင်ငံခြားရေးဝန်ကြီး မိုတီဂီ တိုရှီမစ်ဆုကတော့ ပြီးခဲ့တဲ့အပတ်က ဝန်ကြီးချုပ် ပြောကြားခဲ့တဲ့အရာကို ပြန်လည်ရုပ်သိမ်းဖို့ မလိုဘူးလို့ ပြောပါတယ်။ ဒီပြောဆိုမှုရဲ့ အဓိပ္ပါယ်ကို တရုတ်နိုင်ငံကို ရှင်းပြခဲ့ပြီး ပွင့်လင်းတဲ့ ဆွေးနွေးမှုတွေရှိဖို့ လိုအပ်တယ်လို့ သူကဆိုပါတယ်။
“ဂျပန်နှင့် တရုတ်အကြား စိုးရိမ်ပူပန်မှုတွေနဲ့ အမြင်ကွဲပြားမှုတွေ ရှိနေတာကြောင့် အစိုးရနဲ့ ပုဂ္ဂလိကကဏ္ဍ နှစ်ခုစလုံးဟာ ကျယ်ပြန့်တဲ့ နယ်ပယ်တွေမှာ အချင်းချင်း ဆက်သွယ်ဖို့ အရေးကြီးတယ်လို့ မိုတီဂီက ပြောပါတယ်။
ဂျပန်ပညာရေးဝန်ကြီးဌာနကတော့ တရုတ်နိုင်ငံရှိ ဂျပန်ကျောင်းတွေ သို့မဟုတ် အခြားကျောင်းတွေမှာ တက်ရောက်နေတဲ့ သူ့နိုင်ငံသားတွေကို ဘေးကင်းရေးအစီအမံတွေ ထားရှိဖို့ သတိပေးထားပါတယ်။ ဒေသခံဓလေ့ထုံးတမ်းတွေကို လေးစားဖို့၊ ဒေသခံတွေနဲ့ ဆက်ဆံရာမှာ အပြုအမူတွေကို သတိထားဖို့ တိုက်တွန်းထားပါတယ်။
Ref:NHK
Photo:Chosun
